MADDALENA

Sta sera mi sò decisu, chì n'aghju la mente ferma
Di mette mi à tavulinu, carta, calamaru è penna,
Per fà ti duie canzone, chì la mio manu ùn mi trema

Mancu lu core mi trema, la cosa hè bella spiecata,
A notte cum'è lu ghjornu, pensu à la mio innamurata,
Chì si chjama Maddalena, è mi hà discioltu ogni pena

Quandu vi aghju dumandatu, à lu caminu in salottu,
M'avete toccu la manu è m'avete strintu l'ochju,
Oghje mi vultate e spalle, fate cum'è le farfalle

Fate cum'è le farfalle, ingannate da le stelle,
S'elle sò tutte cusì, in paese le zitelle,
Chì di prumette è mancà, ùn s'averebbe da fà

Finiscu chì mi dà pena, à parlà di lu m'amore,
Vogliu dumandà quantunque una grazia à lu Signore
Ch'ellu mi tenghi in salute, sempre cun listessu core