U CIUCCIU E U PALLÒ

Ti darà l’orizonte
U ventu cù u sole
E piaghje è po i monti
L’acceli in lu so volu

Ti darà a billezza
L’abbracciu è a spartera
E tutte e ricchese
Di l’antica manera

Ti darà u batellu, u portu, u viaghju
U ventu ind’è e vele, a casa, u pagliaghju
Tutte e puesie di pueti verdi
A porta aparta à tutti, paisani o frusteri

Ti darà a passione è a simplicità
E l’amore di l’altri per fatti viaghjà
Ti darà a pudenza u garbu senza viziu
E po u so pallò in segnu d’amitizia

Ti darà u so fiatu l’immensu di u so core
E tale una mamma a passione è l’amore
Ti darà a so corsa à i chjassi di a storia
E u pugnu pisatu in segnu di vittoria

E infine l’eternu di una testa mora
Stampata in focu d’oru annantu à u so core.