ZI' ANTO

Caletevi o Zi’ Anto
A nantu a ‘ssa petra tonda
Mi tinaraghju in puso’
E chjachjaremm’ una stonda
Un mi vulete cunta
Qualchi passatu tramenti
Un fattu di tempu fa,
Ni saria bè cuntenti.
Eu a vi dicu franca
Di a luna un n’aghju attechja
Sola vostra barba bianca
Un mi da micca spavechju...

Contetimi i sirati
A lu ghjiru di u fuconu
Quand’i nostri antenati
Spartianu o bucconu
Quand’ a nostra Cursichella
Un’ era tant’ affannata
Quand’a vita era piu bella
Bè ch’ella fussi stintata

Ditimi di u mulateru
U lamentu o a canzona
U chjoccu di i sunaglieri
Vicinu a la stazzona
Ditimi lu ballu stranu
In fondu di li pineti
Quandu sbuccava lu branu
Di li cervi e li muvretti
Eu a dicu franca
Di a luna aghju spavechju
Sola a vostra barba bianca
E sempre lu me attechju...