I NIVULA DI DICEMBRI

Abbughjani u celi
Di biancu nivulosu
Piattatu hè u soli
Pò stà à u riposu
Accumpagnani tandu
U dulci fritulonu
Di i seri chjinati
In ghjira'llù fuconu

E a mamma appronta
Qualcosa da mandà
A u fiddolu luntanu
Che mossu à travaddà
Aspetta à u balconu
U piu beddu rigalu
Quiddu di u ritornu
Par affistà natali

I ziteddi adduniti
Circanu à spiicà
L'ochja tesi à i cimi
A si danu à bramà
Chi nantu à u paesi
Falessi una nivata
Pà pudè ghjucà insembi
Tutt'a santa ghjurnata

Ribombani in ghjesa
I canti pa l'onori
Di u ciucciu brammatu
U natu ridentori
Prontu hè u cippu
Di quidda notti santa
S'apronta in ugni casa
Una festa tamanta