AUROPA DI LI CHJUCHI

L'avvene sbunuratu
Tale un cundanatu a morte
Quandu s'aprenu le porte
Di l'ultimi centu passi

L'avvene che tu m'offri
Rigalu invelinatu
Chi ghje statu arrubatu
A lu sudore e a lu soffre

Auropa di li chjuchi
Alza la voce e fatti sente
Fatti dolce o viulente
Per ùn più cunnosce inghjulie

L'avvene ie ci credu
Incu la sa mudernita
Incu a sa voglia d'ingrandà
In ogni paese u so veculu

L'avvene ie ti vogliu
Senza differenza alcuna
Senza ch'ellu ne manchi unu
Nome in lu to fogliu

Auropa di li chjuchi
Alza la voce e fatti sente
Fatti dolce o viulente
Per ùn più cunnosce inghjulie

Avvene ti camperaghju
Incu una vulunta d'esse
Cum'a liberta si tesse
Un'avvene ti deraghju

Avvene site voi
Figlioli di dumane
Inseme datevi la manu
No a l'Auropa senza noi

Auropa di li chjuchi
Alza la voce e fatti sente
Fatti dolce o viulente
Per ùn più cunnosce inghjulie

In l'Auropa ci si tu
Corsica Maraviglia
Ch'ùn s'arruba, e ch'un si piglia
In sta Auropa ghjucu, campaci ancu tu