A CURSITA

Incu isse parulle scritte
In fondu à l'ochji chjari
È isse lacrime zitte
Mezu à li to più cari
Cum'ella hè dolce
À parlà
A meia
A cursità

Incu issu trappu d'amore
Chi vi corre a pelle
Cusi bellu culore
Chi t'accende di stelle
Cum'ella hè bella
À cantà
A toia
A cursità

Incù i so paisoli
D'amarezze cutrate
Ùn ci so i figlioli
Hè finitu l'estate
cum'ella vene
À trimà
A meia
A cursità

Incù isse pagine storia
Mezu à u libru chjosu
Pe u ventu memoria
Quandu tuttu hè ritrosu
Cum'ella hè dura
À campà
A meia
A cursità